Нийслэл хот орчмын зарим түүх, соёлын дурсгалт газрууд хадгалалт, хамгаалалт дутмагаас тонож сүйтгэгдэх, устах эрсдэлтэй байдаг. Тэгвэл Нийслэлийн Аялал Жуулчлалын Газар, ШУА-ийн Археологийн хүрээлэн хамтран Их тэнгэрийн аман дахь Хүрэл зэвсгийн үед хамаарагдах хадны сүг зургийг хамгаалалтад авч, орчныг нь тохижуулжээ.
Их тэнгэрийн аманд дахь хадны сүг зураг нь Улаанбаатар хотын хамгийн алдартай сүг зурагт тооцогддог байна. Учир нь одоогоос гурван мянган жилийн өмнөх Хүрэл зэвсгийн үед холбогдох улаан зосон зураг, 18-19-р зууны үеийн төвд бичээс, 13-р зууны үеийн хар бэхэн зураг гэсэн гурван үеийн түүх, соёлын дурсгал тэмдэглэгдэн үлджээ.
Уг хадны сүг зураг нь өндөрт байрладаг учир тэр бүр хүн анзаарахгүй, харин зорьж очсон хүмүүс заавал хад руу авирах шаардлагатай байсан. Тэгвэл байгалийн чулууг ашиглан шат хийж, авто машины зогсоол байгуулан орчныг нь тохижуулжээ.
Түүх, соёлын үл хөдлөх дурсгалыг хамгаалах нь үр хойчдоо түүхээ гэрчлэн үлдээж байгаагийн томоохон илрэл бөгөөд цаашлаад аялал, жуулчлалын салбарт ч чухал нөлөөтэй байна.
