Зохиогчийн эрхийн зөрчилтэй холбоотой асуудал нь манай улсын хувьд шинэ сэдэв биш боловч өнөөг хүртэл шийдлээ олоогүй байна. Тодруулбал цахим орчинд оюуны өмчийн хулгай газар авсаар байгаа ба хууль эрхзүйн орчны хэрэгжилт хангалтгүй, мөн нарийн зохицуулалт, журам манай улсад байхгүй нь хүндрэл учруулж байна гэж салбарынхан мэдээллээ.
Монголын үндэсний худалдаа аж үйлдвэрийн танхим, монголын оюуны өмч хамгаалах холбоо хамтран “Зохиогчийн эрх ба цахим орчны хамгаалалт” сэдэвт хэлэлцүүлгийг зохион байгууллаа. Уг хэлэлцүүлэгт оюуны өмчийн цахим зөрчлийг илрүүлэх системийг боловсронгуй болгох буюу хялбаршуулсан журмаар илрүүлж, шийдвэрлэх эрх зүйн орчныг бүрдүүлэх хэрэгцээ, шаардлагын талаар чухалчлан хэлэлцлээ.
Бидний өдөр тутмын амьдрал цахим ертөнцөөс хамааралтай болохын хэрээр интернэт орчинд зохиогчийн эрхийн зөрчил түгээмэл гарсаар байна. Тухайлбал, цахим орчинд кино уран бүтээл алдагдаж байгаа нь уран бүтээлчдийн хувьд асуудал болсоор байна. Кино театрууд тухайн уран бүтээлийн үзэлтийн мэдээллийг уран бүтээлчдэд ил тодоор өгдөг байтал бусад сувгууд буюу ОТТ, IPTV-ийн кино үзэлтийн дүн нь шилэн биш байна. Энэ бол зохиогчийн эрхтэй холбоотой хөндөх нэг чухал асуудал юм.
Ийнхүү зохиогчийн эрхтэй холбоотойгоор манай улсад хуул эрхзүйн орчин бүрдсэн байдаг ч хэрэгжилт хангалтгүй мөн нарийн журам, стандарт байхгүйгээс үүдэж зохиогчийн эрхийн зөрчил гарсаар байгааг мэргэжлийнхэн ярьж байсан юм. Мөн цахимд гарч байгаа зохиогчийн эрхийн хулгайг ямар аргааг илрүүлж, хэрхэн таслан зогсоох талаарх зөрчлийг илрүүлэх цахим системийг боловсруулах хэрэгтэй байна.
