Бага насны хүүхэд болон эмэгтэйчүүд гамшигт өртөх байдал нь эрэгтэйчүүдээс 14 дахин илүү байна. Гэтэл манай улсад гамшиг тохиолдсон үед нийгмийн эмзэг бүлгийнхэн буюу өндөр настан, хүүхэд багачууд, жирэмсэн эмэгтэй, хөгжлийн бэрхшээлтэй иргэдийг хамгаалах, хариу арга хэмжээ авах нэгдсэн систем байхгүй байна.
Хүчтэй газар хөдлөлт болсон үед тулгуур эдийн бэрхшээлтэй иргэн тухайн байршлаасаа хэрхэн гарах вэ, хажууд нь байгаа хүн ямар туслалцаа дэмжлэг үзүүлэх вэ, үүний дараа гамшгийн үеэр тухайн хөгжлийн бэрхшээлтэй иргэний эрүүл мэнд, хоол хүнс гээд наад захын хэрэгцээг нь хэрхэн хангах вэ зэрэг асуудлууд тулгарна. Тиймээс эдгээр асуудлыг гамшгийн үед бус харин урьдчилан төлөвлөгөө гаргаж, салбар хоорондын яамд уялдаатай ажиллах хэрэгтэй байгаа юм. Мөн гамшгийн үед хөгжлийн бэрхшээлтэй иргэнд туслалцаа үзүүлэх талаар иргэдийн мэдлэгийг ч сайжруулах нь чухал байгаа юм.
Гамшгийн үед нийгмийн эмзэг бүлэг буюу өндөр настан, хүүхэд жирэмсэн эмэгтэйчүүд, хөгжлийн бэрхшээлтэй иргэн ямар хариу арга хэмжээ авах талаарх ойлголт ийнхүү манай улсад дутмаг байна. Тиймээс ч ОБЕГ, Гэр бүл, хөдөлмөр, нийгмийн хамгааллын яам, хүн ам, нийгмийн хамгааллын улсын алба нь гамшгаас хамгаалах команд штабын сургуулилтыг 48 цагийн турш хийж, салбарын яамнуудын уялдаа холбоог сайжруулах, гамшгаас хамгаалах төлөвлөгөөг боловсруулах, хариу арга хэмжээ авах талаар зөвлөлдлөө.
- Сонсголын бэрхшээлтэй хүн нурсан барилга, байгууламж дотор гэмтэж бэртсэн үед гар чийдэнгийн гэрлээр дохио өгөх хэрэгтэй
- Мөн хорогдох байранд хоол хүнс, өдөр тутмын хэрэгцээт зүйлс тараах үед дохионы хэл мэдэхгүй тохиолдолд гаран дээрээ эсвэл цаасан дээр бичиж харилцах хэрэгтэй
- Харин харааны бэрхшээлтэй хүний тохой, гараас нь хөтөлж замчлахдаа хөдлөхийн өмнө аль чиглэлд, хэр хол явах талаар заавал хэлэх хэрэгтэй. Жишээлбэл, өнцөг булан эргэх, шатаар өгсөх, буух зэрэг үед анхааруулж хэлэх зайлшгүй шаардлагатай гэж япон улсын компаниуд гамшгийн хариу арга хэмжээндээ тусгасан байна.
