АНУ-ын 50 мужид эсэргүүцлийн арга хэмжээ зохион байгуулагдсан бөгөөд жагсагчид "Ажилчид эрх мэдэлтэй байх ёстой", "Хаант засаглалгүй нийгмийн төлөө", "Израилыг зэвсэглэхээ боль", "Эрх мэдлээ хязгаарла" гэсэн уриа лоозонг барин жагсжээ.
Зарим жагсагчид Д.Трампын Засаг захиргаа цагаачдыг албадан гаргаж байгаа нь хүний эрхийн зөрчил, мөн төрийн албан хаагчдыг бөөнөөр нь цомхотгож байгаа нь хууль ёсны дагуу шийдвэр биш гэж ярьсан байна. Түүнчлэн Д.Трампын Засаг захиргаа их дээд сургуулийн бие даасан байдал, сургалтын хөтөлбөр, нийгмийн үзэл баримтлалд халдаж, санхүүжилтийг царцаана гэж сүрдүүлснийг эрс эсэргүүцэж байгаагаа жагсагчид хэлжээ.
Арга хэмжээний үеэр жагсагчид Украины улс, ард түмнийг дэмжиж байгаагаа илэрхийлж, ОХУ-ын ерөнхийлөгч В.Путины түрэмгийллийг зогсоохын тулд шийдэмгий хариу арга хэмжээ авахыг Д.Трампын Засаг захиргаанаас шаардаж байлаа.
Өнгөрсөн 1-р сард АНУ-ын ерөнхийлөгч Д.Трамп тангараг өргөснөөсөө хойш холбооны засгийн газрын 200 мянга алба хаагчдыг ажлаас чөлөөлөх ажлыг гардан гүйцэтгэж, засгийн газрын дэргэдэх хүмүүнлэгийн болон төрөлжсөн агентлагуудыг татан буулгаж эхэлсэн юм.
Мөн Д.Трампын Засаг захиргаа гадаадын оюутнуудын эрхийг хязгаарлаж, олон талт байдал, тэгш эрх, хамруулах хөтөлбөр, уур амьсгалын өөрчлөлттэй тэмцэх санаачилгыг цуцалж, санхүүжилтийг царцаана гэж сүрдүүлсэн юм.
Эсэргүүцлийн жагсаал Нью-Йорк, Чикаго зэрэг олон арван томоохон хотод зохион байгуулагдсан төдийгүй Д.Трампыг албан тушаалдаа орсноос хойш хоёр дахь удаагаа тус улсын хэмжээнд эсэргүүцлийн арга хэмжээ өрнөж байна.
