Өнөөдөр УИХ-ын ээлжит бус чуулган эхэлж, төрийн зардлыг танан, 1.4 их наяд төгрөг хэмнэхээр төлөвлөсөн энэ оны төсвийн тодотголыг хэлэлцэж байна. Төсвийн тодотголоор хэмнэсэн хөрөнгийг цалин, тэтгэвэр, эрчим хүч болон хүнсний хангамжид зарцуулахаар ЗГ-аас төлөвлөөд байгаа юм.
Энэ оны төсвийн тодотголоор 1.4 их наяд төгрөгийг хэмнэхээр төлөвлөж, тухайн хэмнэлтийг иргэдэд нэн шаардлагатай зардалд шилжүүлэхээр төлөвлөжээ. Тухайлбал боловсролын салбарын ажилтнуудын цалинг нэмэхэд 674.5 тэрбум төгрөг, төрийн үйлчилгээний бүх салбарын цалинг нэмэгдүүлэхэд 166.3 тэрбум төгрөг тусгасан байна. Мөн ирэх 11-р сараас 435 мянган ахмадын суурь тэтгэврийг нэмэгдүүлэхэд 196.3 тэрбум төгрөг, хүнсний нөөц бүрдүүлэхэд 150 тэрбум төгрөг, эрчим хүчний үнийн өсөлтөөс хамаарч өрхийн санхүүд ачаалал үүсгэхгүй байхад 107.3 тэрбум төгрөг, эрчим хүчний их засвар, тоног төхөөрөмжийн шинэчлэлд 92.7 тэрбум төгрөг зарцуулахаар тусгажээ.
Ийнхүү 2026 оны төсвийг танаж байгаа ч 2027 оны төсвийн зардлыг энэ оны төсвөөс даруй 10 орчим их наяд төгрөгөөр нэмэгдүүлсэн юм. Тухайлбал боловсролын салбарт 7.5 их наяд төгрөг, нийгмийн хамгаалалд 6.1 их наяд төгрөг, эрүүл мэндийн салбарт 2.6 их наяд төгрөг төлөвлөжээ. Түүнчлэн сангийн сайдын багц 5.3 их наяд төгрөг төсөвлөж байгаа бөгөөд үүнээс 1.57 их наяд нь зээлийн хүүгийн төлбөрт зарцуулагдана. Өөрөөр хэлбэл төсвийн тодотголоор зардлаа танаж байгаа ч зарим хэсгийг нь дахин хуваарилж, алдагдалтай төсвийг үргэлжлүүлэхээр байна гэдгийг зарим УИХ-ын гишүүд шүүмжилж байна.
2026 оны тодотголоор төр зардлаа танаж, хэмнэсэн төсвийг цалин, тэтгэвэр, хүнс, эрчим хүчний зардалд чиглүүлэхээр төлөвлөөд байгаа. Гэсэн хэдий ч ирэх 2027 оны төсвийн төслийг 43.6 их наяд төгрөгийн зарлагатай, 2.3 их наядын алдагдалтай байхаар тооцсон нь төсвийн хэмнэлт бодитоор хэрэгжих үү, зарлагын өсөлтийг хэрхэн барих вэ гэдэг асуудлыг дагуулж байна.
