Төсвийн тогтвортой байдлыг хамгаалах үүрэгтэй УИХ-ын байнгын хороодын өчигдрийн хуралдаанаар гишүүд эсрэг байр суурьтай санал хураалт явуулж, төсвийн алдагдлын хязгаар дээр зөрчилдлөө. Тодруулбал, “Төсвийн тогтвортой байдлын тухай хууль”-д төсвийн алдагдлыг ДНБ-ий 2 хувьд барихаар өөрчлөх санал дэмжигдсэн байна. Гэвч зарим гишүүн алдагдлыг бууруулахгүйгээр, нэмэгдүүлэх нь эдийн засагт томоохон дарамт болно гэдгийг анхаарууллаа.
“Төсвийн тогтвортой байдлын тухай хууль”-ийн төсөлд төсвийн алдагдлын хэмжээг гурван хувиас хоёр хувь болгон бууруулах санал 70.3 хувийн саналаар дэмжигдсэн. Гэвч үүний зэрэгцээ гадаадын зээл, тусламжийг бүрэн ашиглах боломж хязгаарлагдаж, мөнгөний үнэ цэн буурч байна гэж УИХ-ын зарим гишүүд шүүмжиллээ.
Нөгөө талд өнгөрсөн баасан гарагийн нэгдсэн хуралдаанаар гишүүдийн дундах ойлголтын зөрүүнээс болж төслийн 7 нэгжийн зардал хасагдсан гэх асуудлыг гишүүд хөндлөө. Харин Сангийн сайд энэ нь батлагдаагүй хөрөнгийг зарцуулсан асуудал биш, төсвийн ерөнхийлөн захирагчийн багц руу шилжүүлж байгаа зохицуулалт гэдгийг тайлбарлаж байна. Гэвч төсөв гэдэг хэдэн мөрийн зардлыг нэг багцаас нөгөөд шилжүүлэх төдий асуудал биш. Иргэдийн цалин, тэтгэвэр, төрийн зардал, үндэсний баялгийн сан, нийгмийн болон эрүүл мэндийн даатгалын сангийн мөнгө яригдаж байгаа үед ойлголтын зөрүү гэдэг тайлбар өөрөө хангалтгүй байгааг УИХ-ын зарим гишүүд болон Сангийн сайд шүүмжилж байна.
Түүнчлэн төрийн өмчит болон төрийн өмчийн оролцоотой уул уурхайн компаниудын ногдол ашгаас үндэсний баялгийн санд төвлөрүүлээд, үлдэх хэсгийг улсын төсөвт ногдол ашгийн орлого хэлбэрээр төвлөрүүлэх саналыг ажлын хэсэг гаргажээ.
