Дэлхий дахин Украины дайныг дуусгавар болгох дипломат арга замыг эрэлхийлж буй энэ цаг үед олон улсын геополитикийн хөшигний ард нууц хэлэлцээ болжээ. Тухайлбал АНУ болон ОХУ-ын эрх баригчид хоёр жилийн өмнө Балтийн тэнгисийн ёроолд болсон дэлбэрэлтийн улмаас үйл ажиллагаа нь зогссон гэгддэг "Умардын урсгал" хийн хоолойг сэргээх асуудлаар хэлцэл хийжээ.
АНУ болон ОХУ-ын төрийн өндөр дээд албан тушаалтнууд Европ руу чиглэсэн байгалийн хийн урсгалыг сэргээх асуудлаар нууц хэлэлцээ өрнүүлсэн нь олон улсын анхаарлыг татлаа. Уг алхам нь зөвхөн эрчим хүчний худалдаа төдийгүй, дайны дараах дэлхийн шинэ дэг журмыг тогтоох бизнесийн томоохон тохиролцооны эхлэл байж магадгүй юм.
Энэхүү нууц дипломат шугамыг АНУ-ын ерөнхийлөгчийн тусгай элч Жаред Кушнер болон Оросын шууд хөрөнгө оруулалтын сангийн тэргүүн Кирилл Дмитриев нар чиглүүлж байгаа гэж Ройтерс агентлаг мэдээллээ. Харин тэдний хэлэлцэж буй төлөвлөгөө нь тун сонирхолтой бөгөөд "Умардын урсгал"-ын эзэмшилд Америкийн хөрөнгө оруулагчдыг оруулж ирэх, Оросын "Лукойл" компанийн Европ дахь хөрөнгийг зарах зэрэг эдийн засгийн гүнзгий харилцааг агуулж байна. Энэ нь АНУ-ын засаг захиргаа дайныг зогсоох энхийн гэрээг байгуулахад бизнесийн ашиг сонирхлыг гол хөшүүрэг болгон ашиглахыг зорьж буйг илтгэж байна. Хэрэв энэ хэлцэл амжилттай болбол Оросын байгалийн баялаг Америкийн хөрөнгөтэй холбогдож, дайны дараа Евразийн эрчим хүчний зураглалыг бүрэн өөрчлөх юм.
Гэвч бодит байдал дээр уг төлөвлөгөө ажил хэрэг болоход асар том саад бэрхшээлүүд тулгарч болзошгүй юм. Тэр дундаа Европын холбоо, Герман, Польш зэрэг орнууд Оросын хийнээс хамааралтай байсан гашуун сургамжаасаа болоод энэ алхмыг эрс эсэргүүцэх төлөвтэй байна.
Германы улс төрчид үүнийг "Америк, Орос хоёр дундаас нь ашиг хүртэж, Европыг золиослох гэж байна" хэмээн шүүмжилж эхэлжээ. Олон улсын хатуу хориг арга хэмжээ хүчин төгөлдөр байгаа бөгөөд Европ 2027 он гэхэд Оросын эрчим хүчнээс бүрэн татгалзах стратегийн зорилтоосоо ухрахыг хүсэхгүй байна. Иймд хөшигний ард өрнөж буй энэхүү дуулиант хэлэлцээ нь дайныг зогсоох шинэ гарц болох уу, эсвэл холбоотнуудын дунд ан цав үүсгэсэн далд хуйвалдаан болон үлдэх үү гэдгийг цаг хугацаа харуулах юм.
