Улсын хэмжээнд 10-р сарын 11-ний байдлаар ой, хээрийн  172 гал түймэр бүртгэгдэж, 7.9 орчим тэрбум төгрөгийн хохирол учирчээ

Улсын хэмжээнд 10-р сарын 11-ний өдрийн байдлаар ой, хээрийн гал түймрийн 172 удаагийн тохиолдол бүртгэгдэж, 7.9 орчим тэрбум төгрөгийн хохирол учирчээ. Харин гал түймрийн дийлэнх нь хүний буруутай үйл ажиллагаанаас үүдэлтэй байгаа тул төвийн болон зүүн аймгуудад хуурайшилтын түвшин өндөр байгаа энэ цаг үед иргэн бүрийг сонор сэрэмжтэй, хариуцлагатай байхыг онцгой байдлын ерөнхий газраас анхааруулж байна.

Манай улсын хэмжээнд 10-р сарын 11-ний өдрийн байдлаар нийслэлийн 2 дүүрэг, 12 аймгийн 63 суманд нийт 172 удаагийн ой, хээрийн гал түймэр бүртгэгджээ.
Энэ нь өмнөх оны мөн үетэй харьцуулахад 36.2 хувиар буурсан үзүүлэлт юм.
Гэсэн хэдий ч нийт түймрийн 77 хувь буюу 134 нь хээрийн түймэр байна. 
Харин ой, хээрийн гал түймрийн улмаас 1 иргэн нас барж, 2 иргэн түлэгдсэн байна.
Мөн 12 гэр, 2 байшин, 6 өвөлжөө, 38 хашаа саравч, 6 автомашин, техник хэрэгсэл, 131 бод, 1,012 бог мал өртжээ.
Урьдчилсан байдлаар нийт 1.6 сая  га талбай түймэрт өртөж, 7.9 орчим тэрбум төгрөгийн хохирол учирсан байна.
Ой, хээрийн гал түймрийн аюулаас 4,950 гэр, 25 өвөлжөө, хашаа саравч, 8 автомашиныг авран хамгаалж, 3 өрхийн 8 иргэн, 3,760 орчим малыг нүүлгэн шилжүүлжээ.
Нийт түймрийн хамгийн олон тохиолдол Дорнод аймагт 61, Сүхбаатар аймагт 39, Хэнтий аймагт 28 удаа бүртгэгдсэн байна.

Цаг уур, орчны шинжилгээний газрын мэдээлснээр баруун бүсийн аймгуудад хуурайшилтын түвшин харьцангуй өндөр байгаа тул иргэдийг сонор сэрэмжтэй байж, ой, хээрийн гал түймрээс урьдчилан сэргийлэхийг анхааруулж байна.

Иймд иргэдийг ОБЕГ-аас ил задгай гал түлэхдээ болон аялал, зугаалгад явахдаа галын аюулгүй байдлыг сайтар сахиж, түймэр гарахаас урьдчилан сэргийлэхийг онцгойлон анхааруулж байна. Гал түймрийн аюултай нөхцөл байдал үүссэн тохиолдолд холбогдох байгууллагад яаралтай мэдээлж, байгаль орчин, өөрийн болон бусдын амь нас, эд хөрөнгийг хамгаалахыг анхаарууллаа.