Нийслэлийн түргэн тусламжийн төв өдөрт ойролцоогоор 1500 дуудлагад үйлчилдэг байна. Гэвч эдгээрийн дунд яаралтай тусламж шаардлагагүй дуудлага цөөнгүй ирдэг байна. Тухайлбал, гартаа өргөс оруулах, шөрмөс татах, зарим тохиолдолд эмнэлгийн тусламжаас өөр шалтгаанаар, буюу утасныхаа тохиргоо хийлгэхээр түргэн тусламж дуудах тохиолдол ч гардаг гэнэ. Харамсалтай нь энэ нь амь нас нь минут, секундээр хэмжигдэж буй өвчтөнд цаг алдалгүй тусламж хүрэхэд хамгийн том саад бэрхшээл болдог байна.
Харин манай улсад түргэн тусламжийн үйлчилгээг иргэдэд үнэ төлбөргүй үзүүлдэг. Манай улсад иргэд түргэн тусламжийг үнэ төлбөргүй авах боломжтой нь эрүүл мэндийн тусламж, үйлчилгээг хүртээмжтэй байлгахын нэг чухал нөхцөл байдаг. Гэвч үнэ төлбөргүй байна гэдэг нь хүссэн үедээ, ямар ч шалтгаанаар дуудаж болно гэсэн үг биш юм. Хамгийн гол нь түргэн тусламжийн баг нэг шаардлагагүй дуудлагад үйлчилж байх хугацаанд өөр газар амьсгал нь боогдсон, зүрх нь зогссон, осол гэмтэлд өртсөн иргэний тусламж авах хугацаа хойшилдог байна.
Түргэн тусламж бол зүгээр нэг үнэ төлбөргүй үйлчилгээ бус, хүний амь насыг аврах зориулалттай онцгой үйлчилгээ юм. Иймээс иргэн бүр дуудлага өгөхдөө хариуцлагатай хандаж, яаралтай тусламжийг шаардлагатай үед нь авах нь чухал байна. Эмч, эмнэлгийн мэргэжилтнүүдийн үзэж байгаагаар амь насанд аюултай, яаралтай тусламж шаардлагатай өвчтөнүүдэд үйлчилгээг үнэ төлбөргүй харин эмнэлгийн яаралтай тусламж шаардлагагүй дуудлагад тодорхой хэмжээний төлбөр тогтоох зохицуулалт хэрэгтэй гэсэн байр суурыг илэрхийлж байна. Ингэснээр түргэн тусламжийн үйлчилгээг зөв зохистой ашиглаж, амь нас нь эрсдэлд орсон иргэдэд цаг алдалгүй хүрч үйлчлэх боломжийг нэмэгдүүлэх юм.
