УИХ-ын чуулганы хуралдаанаар төсвийн тогтвортой байдлын тухай хуульд нэмэлт оруулах тухай хуулийн төслийн анхны хэлэлцүүлгийг хийлээ. Энэ үеэр төсвийн зарлагыг бодитой бүртгэж, тайлагнах асуудлыг УИХ-ын зарим гишүүд хөндөж, засгийн газраас орон нутгийн төсвийн үлдэгдэл, ногдол ашиг, бондтой холбоотой зохицуулалт хийхээр төсөл боловсруулсан ч төсвийн хязгаарлалтыг тойрч гарах эрсдэлтэйг анхаарууллаа.
УИХ-ын зарим гишүүдийн зүгээс нэг удаагийн асуудлыг шийдэхийн тулд төсвийн тогтвортой байдлыг зохицуулдаг төсвийн тогтвортой байдлын тухай хуульд өөрчлөлт оруулах нь буруу гэж үзэж байгаагаа хатуу илэрхийллээ. Анх 2010 онд батлагдсан тус хууль өнөөг хүртэл нийтдээ 24 удаа шинэчлэгдсэн бөгөөд олон дахин нэмэлт өөрчлөлт оруулах нь төсвийн бодлогын тогтвортой байдлыг алдагдуулна гэж удаа дараа анхааруулсаар байгаа юм. Гэсэн хэдий ч ажлын хэсгийн ахлагч орон нутгууд бондоор босгосон хөрөнгөө олон жил дамжуулан зарцуулахгүйгээр бүтээн байгуулалтад ашиглах боломж бүрдүүлэх зорилготойг тайлбарлалаа.
Тэгвэл ирэх оны улсын төсвийн зардлыг хязгаарт тооцохгүй орхихын оронд орлого, зарлагыг үнэн зөв бүртгэж, ил тод тайлагнах ёстойг анхааруулсан юм. Мөн ажилгүйдлийн тэтгэмж авагчдын тоо жилээс жилд өсөж, 2023 онд 30 мянган иргэн тэтгэмж авсан бол 2025 онд 37 мянга болж, 2026 оны эхний 9 сарын байдлаар 34 мянгад хүрчээ. Иймд оны эцэст энэ тоо 50 мянгад хүрч болзошгүйг УИХ-ын зарим гишүүд анхаарууллаа.
Төсвийн хуулийг жил бүр өөрчилж, тулгамдсан асуудлыг түр зохицуулахын оронд төсвийн орлого, зарлагын бүртгэлийг цэгцэлж, урт хугацаанд мөрдөх тогтвортой зохицуулалт бий болгох шаардлагатай байна. Үүний зэрэгцээ ажилгүйдлийн шалтгааныг бодит тоо баримтад тулгуурлан тогтоож, ажлын байрыг хадгалах арга хэмжээ авах нь чухал гэдгийг УИХ-ын зарим гишүүд мөн онцолсон юм.
