Өнгөрөгч бямба гарагт Польш улсын түүхэн аялал жуулчлалын төв болох Краков хотын төв талбайд зэвсэгт этгээд гал нээсний улмаас 6 хүн амиа алдаж, 15 хүн шархаджээ. Тус улсын прокурорын газраас уг хэргийг "Террорист ажиллагаа" хэмээн тодорхойлж, мөрдөн шалгах ажиллагаа эхлүүлж, улс даяар хоёр өдрийн үндэсний гашуудал зарлаад байна.
Цэргийн загвартай хувцас, сум үл нэвтрэх хантааз өмссөн Польш улсын 24 настай иргэн автомашинаас бууж ирмэгцээ гудамжинд зорчиж явсан иргэд болон нийтийн тээврийн хэрэгсэл рүү автомат буугаар замбараагүй гал нээсэн байна. Харин тэр үед тухайн бүсэд эргүүл хийж байсан цагдаагийн алба хаагчид сэжигтнийг дараагийн үйлдлээ хийхээс нь өмнө шуурхай арга хэмжээ авч, баривчилсан байна. Уг халдлагын үеэр сэжигтэн зэвсэгт этгээд болон хоёр цагдаа шархдан эмнэлэгт хүргэгдсэн байна.
Мөрдөн байцаалтын явцад халдлага үйлдсэн этгээдийн гэрээс түүний аав, ээж болон эмэгтэй дүүгийнх нь цогцос буудуулсан байдалтай олджээ. Сэжигтэн этгээд гэр бүлийнхээ гишүүдийг хөнөөсний дараа Краков хотын төв талбай руу ирж масс халдлага үйлдэн 6 хүний амийг хөнөөсөн байна.
Амь үрэгдсэн 6 хүний дунд Польш улсын иргэдээс гадна Их Британи, Австри улсын жуулчид байсан нь тогтоогджээ. Тэрхүү зэвсэгт этгээд урьд өмнө нь гэмт хэрэгт холбогдож байгаагүй, цахим орчинд хэт барууны, хэт үндсэрхэг үзэл сурталд автсан нэгэн байсныг Польшийн дотоод хэргийн яамнаас ил болгожээ.
