Испанийн Ла Лигийн хүрээнд Барселона 28 дахь тоглолтдоо Реал Сосьедадыг 6:1-ээр хожиход Лионель Месси Каталоны клубийн төлөө хамгийн олон тоглолтод оролцсон түүхэн дээд амжилтыг тогтоогоод зогсохгүй хоёр гоол толилуулжээ. Тодруулбал Барселонагийн төлөө хамгийн олон тоглолтод оролцсон рекордыг Чави Эрнандез эзэмшиж байсан юм. Харин одоо Лионель Месси 768 тоглолтод оролцсон үзүүлэлттэй болоод байна. Месси 21 дэх жилдээ Барселона клубийн төлөө тоглож байна. Ялангуяа 2004 оноос нэгдүгээр багтаа нэгдэж тус 768 тоглолтод 663 гоол оруулаад байна. Харин Барселона одоо Испанийн дээд лигийг тэргүүлж буй Атлетико Мадридаас 4 оноо дутуу хүснэгтийн дэд байрт 62 оноо (19-5-4)-той эрэмбэлэгдэж байна.
