Германы хөл бөмбөгийн Боруссия Мюнхенгладбах клуб испанийн шигшээ багийн тоглогч асан Чави Алонсог дасгалжуулагчаараа томилохоор болсон тухай тус улсын Билд сонин мэдээлжээ. Гэхдээ 39 настай испани эр ирэх улирлаас Бундеслигийн багийг удирдах юм байна. Чави Алонсо 2017 онд Байерн Мюнхен клубээс зодог тайлж, дараа жил нь Реал Мадридын өсвөрийн багт дасгалжуулагчийн замналаа эхлүүлсэн бол 2019 оны зунаас хойш нутгийнхаа Реал Сосьедад клубийн хоёрдугаар багт ажиллаж байгаа юм. Алонсо өөрөө тамирчны замналаа 1999 онд Реал Сосьедадын хоёрдугаар багт эхлүүлж, улмаар дараа жил нь үндсэн багт дэвшин 2004 оны наймдугаар сард Английн Ливерпульд нэгдэж байлаа. Реал Сосьедадын төлөө 124 тоглолтод оролцсон тэрбээр Мерсисайдын багийн төлөө 2009 оны найман сарыг хүртэл тоглохдоо 210 тоглолтод гарчээ. Улмаар Реал Мадридад 236 тоглолт хийгээд хожим нь Германы аваргуудын бүрэлдэхүүнд 117 тоглолтод оролцсон байна. Тамирчны хувиар 701 тоглолтод оролцон 44 гоол оруулж, Ливерпультэй Английн цом (2005/06), Аваргуудын лиг (2004/05)-т түрүүлж, Английн болон Европын Супер цомуудыг хүртэн Реал Мадридад Испанийн лиг (2011/12), Испанийн цом (2010/11, 2013/14)-ын тэмцээний аваргаар тодорч, Испанийн Супер цом (2012)-оос гадна Аваргуудын лигийн цом (2013/14) дахин өргөж байлаа. Харин Бундеслигт 2015-17 оны хооронд гурван жил дараалан түрүүлж, Германы цом (2015/16), Супер цом (2016)-уудыг хүртэж байлаа. Тэрбээр Испанийн хөл бөмбөгийн шигшээ багт 2002-2014 оны хооронд 114 тоглолтод оролцож ДАШТ (2010), ЕАШТ (2008, 2012)-үүдэд түрүүлж байлаа. Мөн Испанийн оны шилдэг тоглогч (2003), Ла лигийн шилдэг хагас хамгаалагч (2011/12)-аар тодорч байсан зэрэг хувийн амжилттай нэгэн. Харин Реал Сосьедад клубийн хоёрдугаар багийн дасгалжуулагчаар ажиллах болоод 47 тоглолтод багаа удирдсан (2021.03.21-ний байдлаар)-аас 48.94% (23-12-12)-д нь хожжээ. Блинд сонинд өгүүлснээр Реал Сосьедад клуб түүнтэй холбоотой мэдээлэл одоогоор албан ёсны хариу өгөөгүй байна. Харин Боруссия Мюнхенгладбахын хувьд одоо Бундеслигт 26 тоглолт (9-9-8)-оос 36 оноотой хүснэгтийн 10-р байрт бичигдэж байна. Тэд энэ улирал ЕХБХ-ны Аваргуудын лигийн 1/8 шигшээд Английн Манчестер Сити клубд хоёр тоглолтын нийлбэрээр 4:0 (0:2, 2:0)-ийн харьцаатай ялагдсан юм. Тэдэнтэй одоо ажиллаж буй дасгалжуулагч Марко Розе ирэх улирал Боруссия Дортмундад томилогдохоор тохиролцсон тухай өнгөрсөн сарын дундуур олон нийтэд ил болж байлаа. Түүнээс хойш Боруссия Мюнхенгладбах шинэ дасгалжуулагчаа хайж байсан нь Чави Алонсо юм байна.
