Улаанбаатарын цагаар урьд шөнө явагдсан ДАШТ-ий Европын бүс дэх сонгон шалгаруулалтын хэсгийн эхний тоглолтуудын дүнг танилцуулья.
ПОРТУГАЛ 1:0 АЗЕРБАЙЖАН
Европын аваргууд Италийн Турин хотноо болсон тоглолтод Максим Медведевийн өөрийнхөө хаалганд оруулсан гоолоор хожиж ямартай ч гурван оноотой тэмцээнийг эхлүүллээ. Фернандо Сантосын Португалын шигшээ багийг удирдан байгуулсан 50 дахь ялалт байжээ.
ФИНЛЯНД 2:2 БОСНИ-ХЕРЦЕГОВИН
Гоол ороогүй завсарласан тоглолтын хоёрдугаар хагас эхлээд удаагүй байхад Миралем Пьяничийн гоолоор зочид хошуучилж эхэлсэн ч Теэму Пукки дараалсан гоолоороо тоглолтыг эргүүлж орхисон. Гэхдээ Мирослав Стеванович 84 дэх минутад тэнцүүлснээр хоёр баг оноо хуваалаа.
ФРАНЦ 1:1 УКРАИН
Цомыг хамгаалагчид Антуан Гриезманны 19 дэх минутад оруулсан гоёмсог гоолоор хошуучилж эхэлсэн ч хоёрдугаар хагаст Сергей Сидорчукын оролдлого амжилтад хүрч тоо тэнцсэн байна. Тэнцээний гоол франц хамгаалагч Преснел Кимпембегийн нэр дээр бичигджээ.
БЕЛЬГИ 3:1 УЭЛЬС
Тоглолт эхлээд удаагүй байхад Харри Уильсоны гоолоор Уэльсийн шигшээ хошуучилж эхэлсэн ч Роберто Мартинезийн багаас удалгүй Кевин де Брюйне харьцааг тэнцүүлж, улмаар Торган Азар багийнхаа удаах гоолыг толилуулснаар эхний хагас 2:1-ээр өндөрлөсөн. Харин дараагийн 45 минутад Ромелу Лукаку торгуулийн цохилтоос тоог холдуулсан юм.
ЭСТОНИ 2:6 ЧЕХ
Польшийн Люблин хотноо болсон тоглолтод Эстонийн баг 12 дахь минутад тэргүүлж эхэлсэн ч тоглолт завсарлахад 4:1, хоёрдугаар хагас эхлээд 10 минут болоход 6:1-ээр Чехийн баг тэргүүлж байлаа. Английн Вест Хэм Юнайтед клубийн тоглогч Томаш Соучек 32, 43, 48 дахь минутуудад дараалан гурван гоол оруулж анх удаа шигшээ багтаа хэт-трик толилуулжээ. Чехийн баг дараагийн тоглолтоо Бельгийн эсрэг хийнэ.
ТУРК 4:2 НИДЕРЛАНД
Талбайн эздээс Бурак Йылмаз тоглолтын эхний хоёр гоол (удаах нь торгуулийн цохилт)-ыг оруулж эхний хагас өндөрлөсөн бол Хакан Чалханоглу завсарлагааны дөнгөж дараахан тоог 3:0 болгож холдуулсан юм. Харин Голландын багаас Дэви Классен, Люк Де Йонг нар гоол оруулж тоог ойртуулсан ч тэнцүүлж чадсангүй. Эцэст нь Бурак Йылмаз хэт-трик толилуулжээ.
КИПР 0:0 СЛОВАК
Гоол ороогүй ганц тоглолтын хувьд Словакийн багийн тоглогч, Ньюкасл клубийн хаалгач Мартин Дубравка гурван ч тун аюултай довтолгоог зогсоосон бол тоглолтын сүүлээр сэлгэгдэж талбайд гарсан Иван Шранз багтаа гурван оноо авчирах сайхан боломжоо ашиглаж чадсангүй.
МАЛЬТА 1:3 ОРОС
Энэ сард Словени, Словакийн багуудтай тоглох Оросын шигшээ энэ удаагийн тоглолтод Артём Зюба, Марио Фернандес нарын гоолоор тэргүүллээ. Харин тоглолт эргэн үргэлжлээд удалгүй талбайн эздээс Жозеф Мбонг тоог ойртуулсан ч тэд биш зочид дахин гоол оруулж Александер Соболев тоглолтод цэг тавьжээ.
СЛОВЕНИ 1:0 ХОРВАТ
Хөршүүдийн сүүлийн 10 тоглолтод Словеничүүд анх удаа хожжээ. Санди Ловрич 15 дахь минутад эхний гоол оруулан улмаар Словенийн баг тэргүүллээ амжилттай хамгаалсан байна.
Урьд шөнийн нийт тоглолтуудын дүн:
Эй хэсэг: Португал 1:0 Азербайжан, Серби 3:2 Ирланд
Ди хэсэг: Финлянд 2:2 Босни Херцеговин, Франц 1:1 Украин
И хэсэг: Бельги 2:1 Уэльс, Эстони 2:6 Чех
Жи хэсэг: Гибралтар 0:3 Норвеги, Латви 1:2 Монтенегро, Турк 4:2 Нидерланд
Эйч хэсэг: Кипр 0:0 Словак, Мальта 1:3 Орос, Словени 1:0 Хорват
Мөн Улаанбаатарын цагаар өнөөдөр шөнө бусад хэсгийн эхний тоглолтууд явагдана. София, Тел Авив хотууд дахь тоглолтууд 01:00 цагаас эхлэх бол бусад нь 03:45-аас нэгэн зэрэг эхэлнэ.
Би хэсэг: Испани /03:45/ Грек, Швед /03:45/ Гүрж
Си хэсэг: Болгар /01:00/ Швейцар, Итали /03:45/ Умард Ирланд
Эф хэсэг: Израил /01:00/ Дани, Молдав /03:45/ Фарерын арлууд, Шотланд /03:45/ Австри
Аи хэсэг: Андорра /03:45/ Албани, Англи /03:45/ Сан Марино, Унгар /03:45/ Польш
Жэй хэсэг: Герман /03:45/ Исланд, Лихтенштейн /03:45/ Армени, Румын /03:45/ Умард Македон
