Казахстан улсын Алматы болон Мангистау мужид шингэрүүлсэн нефтийн хийн үнийн өсөлтийг эсэргүүцсэн жагсаал үргэлжилж байгаатай холбоотойгоор тус улсын ерөнхийлөгч Касым-Жомарт Токаев тэдгээр мужуудад өнөөдрөөс эхлэн онц байдал зарлажээ. Онц байдлын дэглэмийг нэгдүгээр сарын 19-ний өдрийг хүртэл үргэлжлүүлнэ гэдгийг албаны эх сурвалж мэдэгдсэн байна.
Ерөнхийлөгчийн зарлигт 23 цагаас өглөөний 7 цаг хүртэл хөл хорих цаг тогтоож, олныг хамарсан арга хэмжээ зохион байгуулахыг хориглож, иргэд болон тээврийн хэрэгслийн хөдөлгөөнийг хязгаарлажээ.
Касым-Жомарт Токаев өмнө нь дүрс бичлэгээр үг хэлэхдээ, жагсагчдад хандан эрүүл саруул ухаанаар тунгааж, хууль бус үйлдэл гаргахгүй байхыг уриалсан байна. Түүний хэвлэлийн нарийн бичгийн дарга Берик Уалигийн “facebook” хуудсанд нийтэлсэн уг дүрс бичлэгт Токаев эсэргүүцлийн жагсаалын улмаас засгийн газар унахгүй, Казахстан улсад зөрчил мөргөлдөөн хэрэггүй, харин харилцан итгэлцэл, яриа хэлэлцээ хийх шаардлагатай гэж мэдэгджээ. Тэрбээр мөн ард иргэддээ хандан өдөөн хатгалгад автахгүй байхыг хүсээд төрийн байгууллага, цэргийн байгууламж руу халдах нь хууль бус гэдгийг сануулсан байна. Түүнчлэн лхагва гарагт засгийн газрын хуралдаан зохион байгуулж, жагсагчдын шаардлагыг хэлэлцэнэ гэж твиттер хуудаснаа мэдэгдсэн байна. Ням гарагт Казахстаны Мангистау мужид шингэрүүлсэн хийн үнэ нэмэгдсэнтэй холбоотойгоор эхэлсэн эсэргүүцлийн жагсаал мягмар тус улсын бараг бүх томоохон хотуудыг хамарч, жагсагчид цагдаа нартай мөргөлджээ.
Өнгөрөгч мягмар гарагт Алматы хотын цагдаа нар хотын захиргаа руу дайран орох гэж оролдсон хэдэн зуун жагсагчийг тараахын тулд нулимс асгаруулагч хий, чимээ гэрэл гаргагч гранат ашигласан байна.
Алматы хотод ажиллаж байгаа “ройтерс” агентлагийн сэтгүүлчдийн мэдээлснээр, хэд хэдэн жагсагч, цагдаагийн ажилтнууд бага зэргийн гэмтэлтэй эмнэлэгт хүргэгдсэн байна. Мөн үймээн дэгдээгчдийг баривчилсан тухай мөн мэдээлсэн байна.
Казахстаны засгийн газрын “Zakon” цахим хуудсанд мэдээлснээр өчигдөр орой цагдаа нар бараг бүх жагсагчийг бүгд найрамдах улсын талбайгаас хүч хэрэглэн холдуулсан бол үймээний үеэр цагдаагийн хэд хэдэн машин шатжээ. Алматы хотод дэлбэрэлтийн чимээ шөнө сонсогдсоор байсан гэж нүдээр үзсэн хүмүүс болон сурвалжлагчид мэдээлжээ. Засгийн газрын комисс жагсагчдад шингэрүүлсэн хийн үнийг бууруулахаа амлаж, тэднийг хариуцлагад татахгүй байх баталгаа өгсөн хэдий ч жагсагчдын олонх нь тараагүй хэвээр байгаа гэж олон улсын сэтгүүлчид мэдэгдсэн байна.
