Иргэд өмнө нь хөдөлмөрийн чадвар түр алдсаны эмнэлгийн магадалгаа буюу листийг авахдаа харьяа дүүргийн эмнэлэгт өөрийн биеэр очиж авдаг байсан. Тэгвэл 1-р сарын 17-ноос эхлэн хөдөлмөрийн чадвар түр алдсаны эмнэлгийн магадалгааг цахимаар олгож эхлээд байна. Ингэснээр жилд 1 тэрбум төгрөг хэмнэхээс гадна 300 мянган хүнд цаг зав, процессын хэмнэлт үүсгэнэ гэсэн тооцоо гарчээ.
Хөдөлмөр, нийгмийн хамгааллын сайд, Эрүүл мэндийн сайдын хамтарсан тушаалаар эрүүл мэндийн байгууллагуудын ашигладаг e-health системд хөгжүүлэлт хийж цахим лист олгох нөхцөлийг бүрдүүлсэн. Одоогоор улсын хэмжээнд 140 эмнэлэг e-health системийг хөгжүүлж, ашиглалтад оруулж иргэдэд цахимаар эмнэлгийн хуудас олгон ажиллаж байна.
Өнгөрсөн 2021 онд 180 мянган хүн хөдөлмөрийн чадвар түр алдалтын тэтгэмж авчээ. “Ковид-19”-ийн халдвартай холбоотойгоор лист авах гэсэн иргэдийн тоо ихсэж эмнэлгийн ачаалал ч мөн адил нэмэгдээд байсан юм.
Иргэдийн зүгээс цаашдаа цахимаар лист олгож буй эмнэлгийн тоог нэмэгдүүлэн, цахим системийг илүү ойлгомжтой энгийн хэрэглээнд нийцүүлэх нь чухал гэдгийг хэллээ.
