Цар тахлын хугацаанд төрөөс иргэд, аж ахуйн нэгжүүдэд цахилгаан эрчим хүчний хөнгөлөлт үзүүлж, хог, ус, дулааны төлбөрийг бүрэн хариуцсан. Зарим шийдвэр энэ оны 1-р сарын 1-ээр дуусгавар болсон бол айл өрхийн цахилгааны төлбөрийн хөнгөлөлт үргэлжилж байна.
Өнгөрөгч 2020 оны 12-р сард Засгийн газрын шийдвэрээр цахилгаан, эрчим хүч, ус, дулаан, хогны төлбөрийг хөнгөлж эхэлсэн. Зарим шийдвэр 2021 оны 12-р сарын 31-ний өдрөөр дуусгавар болсон. 2020-2021 онд сайжруулсан шахмал түлшний үнийг шуудай тутамд 75 хувиар хөнгөлсөн бол 2021-2022 оны галлагааны улиралд нийслэлийн айл өрхүүд тал үнээр нь түлш худалдан авах боломж бүрдсэн. Харин 3-р сарын 31-ний өдрөөс энэ шийдвэр дуусгавар болсноор 4-р сарын 1-ээс иргэд сайжруулсан шахмал түлшийг шуудай тутмыг нь үндсэн үнээр нь буюу 3750 төгрөгөөр худалдан авна. Иргэдэд 7 хоногт 6 шуудай түлш олгох квоттой ч 3-р сарын 30, 31-ний өдрүүдэд 2 шуудай түлш олгосон гэх асуудал үүссэн.
Ийнхүү сайжруулсан түлшний үнийн хөнгөлөлт дуусгавар болж байгаа бол 5-р сарын 31-ний өдрийг дуустал айл, өрхүүдийн цахилгаан, эрчим хүчний үнийн хөнгөлөлт үргэлжилнэ. Энэ шийдвэр дуусгавар болмогц цахилгааны үнэ тариф тутамдаа 49 төгрөгөөр нэмэгдэх хүлээлттэй байна.
