Туркийн ерөнхийлөгч Режеп Тайип Эрдоган ОХУ-ын ерөнхийлөгч Владимир Путинтэй утсаар яриа хэлэлцээгээ үргэлжлүүлэхээ мэдэгджээ. “Энэ долоо хоногт Владимир Путинтэй хэлэлцээ хийхээр төлөвлөж байна” гэж тэрээр сэтгүүлчдэд мэдээлсэн байна.
Тэрбээр Украины мөргөлдөөнийг зохицуулах тодорхой алхмыг Анкара эсвэл Истанбулд хийнэ гэж найдаж байгаагаа илэрхийлжээ. Орос, Туркийн ерөнхийлөгч нар хамгийн сүүлд 4-р сарын 26-нд утсаар ярьжээ. Тухайн үед хоёр улсын удирдагчид Мариуполь хотын нөхцөл байдал болон энгийн иргэдийн аюулгүй байдлыг хангах Оросын талын хүчин чармайлт, тэр дундаа хүмүүнлэгийн коридорыг зохион байгуулах асуудлыг ярилцаж, мөн Туркийн хөлөг онгоцуудыг хар тэнгисийн боомтуудаас гаргах талаар батлан хамгаалах яамдын шугамаар хийж буй зохицуулалтыг үргэлжлүүлэхээр тохиролцсон байна. Орос, Украины төлөөлөгчдийн хэлэлцээ 3-р сарын сүүлчээр Истанбул хотод болсон юм.
Үүнээс гадна Туркийн гадаад хэргийн сайд Мевлют Чавушоглу өчигдөр нэгэн чухал мэдэгдэл хийжээ. Украин-Оросын мөргөлдөөнд НАТО шууд оролцох бодолгүй байгаа ч тус эвслийн аль нэг гишүүн орон ямар нэг хэмжээгээр халдлагад өртсөн тохиолдолд турк улс зохих хариу арга хэмжээ авахыг тэрбээр мэдэгдсэн байна. Тухайлбал “НАТО-гийн байр суурь тодорхой. Уг эвсэл Украины мөргөлдөөнд оролцох бодолгүй байгаа. Гэхдээ эвслийн ямар ч гишүүн орон руу өчүүхэн төдий дайралт хийсэн тохиолдолд бид зохих ёсны хариу арга хэмжээ авах болно” хэмээн мэдэгджээ.
