Пакистанд энэ онд урьд хожид үзэгдээгүй хүчтэй аадар бороо орж, улмаар үерийн гамшиг нүүрлэснийг олон мэргэжилтэн уур амьсгалын өөрчлөлттэй холбоотой гэж үзэж байгаа юм. Тус улсад өнгөрсөн 6-р сарын дунд үеэс хойш 13 мянга орчим хүн гэмтэж бэртсэнээс гадна олон сая хүн орон гэрээ орхихоос өөр аргагүйд хүрч, ургац, байшин барилга хийгээд олон мянган километр зам сүйджээ. Дэлхийн банкны өмнөд азийн бүсийг хариуцсан дэд ерөнхийлөгч Мартин Райсер Пакистанд энэ сарын 25-нд анхны албан ёсны айлчлал хийснийхээ дараа дээрх мэдэгдлийг хийсэн байна. Тэрээр байгалийн гамшигт үзэгдлийн улмаас олон хүн амиа алдан мөн олон иргэд амьжиргаагаа алдсанд гүнээ харамсаж байгаагаа илэрхийлээд, үерт нэрвэгдсэн хүмүүст яаралтай тусламж үзүүлэхээр холбооны болон мужийн засаг захиргаатай хамтран ажиллаж байгаагаа мэдэгдсэн байна. Мартин Райсер айлчлалынхаа хугацаанд холбогдох яамны сайд нар болон байгалийн гамшигт хамгийн их нэрвэгдсэн зүүн нутгийн Синдх мужийн тэргүүн сайдтай уулзаж, Даду дүүргийн нөхцөл байдалтай биечлэн танилцжээ. Тус мужид гамшигт нэрвэгдсэн хүмүүст зориулан эмнэлгийн үйлчилгээ үзүүлэх олон мянган түр хуаранг байгуулсан бөгөөд байгалийн гамшгийн уршгийг арилгах газрын мэдээлснээр, гэдэсний хижиг, хумхаа, денге чичрэг өвчний тархалтын улмаас 300 орчим хүн нас баржээ. Энэ тоон үзүүлэлт нь өнгөрсөн долоо хоногт дэлхийн эрүүл мэндийн байгууллагыг “хоёр дахь гамшиг”-ийн талаар түгшүүр зарлахад хүргэсэн байна. Сүүлийн хоёр сар гаруйн хугацаанд Пакистаны эрх баригчид Синдх муж руу байгалийн гамшигт нэрвэгдсэн хүмүүст эмнэлгийн тусламж үзүүлэх зорилгоор 10 мянга орчим эмч, сувилагч, эрүүл мэндийн байгууллагын ажилтныг илгээжээ. Харин Дэлхийн банк энэ зуны борооны улиралд 1600 иргэнийхээ амийг алдсан Пакистан улсад хоёр тэрбум орчим ам.долларын тусламж үзүүлнэ гэдгээ мэдэгджээ
