Морин хуурын чуулга нь 1992 онд байгуулагдсан түүхтэй. Түүхэн 31 жилийн хугацаанд үндэсний уламжлалт бүтээлүүдээс гадна өрнийн болоод Дорно Дахины сэтгэлгээний онцлог шингэсэн баялаг урын сантай, давхардсан тоогоор дотооддоо бүрэн хэмжээний 5,000 гаруй, дэлхийн бусад 20 гаруй орны тайзнаа 600 гаруй тоглолтоо толилуулсны дээр олон арван нэр хүндтэй уран бүтээлчтэй хамтран бүтээл туурвисан байна. Ийнхүү олон жилийн хөдөлмөрөө үнэлүүлэн Монгол Төрийн дээд шагнал Тэргүүн зэргийн Чингис хаан одонг Морин хуурын чуулга хүртлээ.
Мөн Морин хуурын чуулгын хамт олон төрийн дээд шагнал хүртсэнээр цаашид илүү ихийг хийж бүтээж ажиллах үүрэг хариуцлага ирж байгааг онцоллоо.
Маргаашаас эхлэн Морин хуурын чуулга нь гаднын улсуудад томоохон хэмжээний тоглолтуудыг зохион байгуулахаар болжээ. Морин хуур нь Монгол улсыг дэлхийд сурталчлах зэвсэг байх болно гэдгийг тус чуулгын төлөөллүүд хэлж байсан юм.
