АНУ-ын ерөнхийлөгч Д.Трамп ОХУ-тай байгуулсан цөмийн зэвсгийн гэрээнээс гарахаа мэдэгдлээ

ОХУ-тай байгуулсан цөмийн зэвсгийн гэрээг орхих шийдвэр гаргаснаараа АНУ-ын ерөнхийлөгч Доналд Трампыг алдаа гаргаж байна хэмээн ЗХУ-ын удирдагч асан Михаил Горбачев шүүмжилсэн байна. Түүний хувьд 1987 онд АНУ-ын ерөнхийлөгч агсан Роналд Рейгантай Дунд тусгалын цөмийн зэвсгийг хорогдуулах гэрээнд гарын үсэг зурж байсан юм. Уг гэрээнээс гарах болсон шалтгаанаа ерөнхийлөгч Доналд Трамп ОХУ өнгөрөгч жилүүдэд гэрээг удаа дараа зөрчсөнтэй холбон тайлбарласан бол ОХУ-ын зүгээс энэхүү шийдвэрийн эсрэг сөрөг арга хэмжээ авах болно гэдгээ мэдэгджээ.

Гэрээнд тусгагдсанаар талууд 500-5500 км хол тусах чадалтай, баллистик болон далавчит пуужин бүтээх, ашиглах хориотой бөгөөд АНУ-ын зүгээс ОХУ-ыг энэхүү гэрээг зөрчиж SSC-8 загварын дунд тусгалын пуужин үйлдвэрлэсэн хэрэгт буруутгаад байгаа юм. Тэгвэл энэхүү хэрэг дээр ОХУ-ын Гадаад хэргийн орлогч сайд Сергей Рябков АНУ-ыг энэ янзаараа олон улсын гэрээ хэлцээрүүдээс гарсаар байвал сөрөг арга хэмжээг цэрэг техникийн шугамаар авахаас өөр аргагүй болно гэдгийг анхааруулсан байна. Гэвч нөхцөл байдал ийм дээр тулахгүй гэдэгт найдаж байгаагаа түүний зүгээс илэрхийлжээ.

ОХУ-ын ерөнхийлөгч Владимир Путин энэ долоо хоногт АНУ-ын Үндэсний аюулгүй байдлын зөвлөх Жон Болтоныг Москвад айлчлал хийх үед нь энэ асуудлаар дэлгэрэнгүй ярилцахаар төлөвлөсөн тухай Кремлийн ордноос мэдэгдсэн байна.

 

Б.Амарзаяа