Тайваньд зорчигч тээврийн галт тэрэг осолдож 18 хүн амь үрэгджээ

Тайванийн зүүн хойд зүгт байрлах Илань мужид орон нутгийн цагаар 16:50 орчимд зорчигч тээврийн галт тэрэг замаасаа гарч осолдсоны улмаас 18 хүн амь үрэгдэж, 170 гаруй хүн гэмтэж бэртсэн тухай BBC агентлаг мэдээллээ. Тайванийн нийслэл Тайпэй хотоос Тайтун хотын чиглэлд нийт 366 хүнтэйгээр зорчиж явсан “Puyuma Express” компанийн зорчигч тээврийн галт тэрэг ямар учир шалтгааны улмаас осолдсон талаар хараахан тогтоогоогүй байгаа ч осол гарахаас өмнө утаа болон оч үсэрч, чанга дуу чимээ гарч байсан талаар ослын газар байсан гэрчүүд мэдээлжээ.

Тайпэй хотоос 70 орчим кмийн зайд осолдсон уг галт тэрэг нь ашиглалтанд ороод 6 жил болж байсан бөгөөд осол гарахаас өмнө хэвийн үйл ажиллагаатай байсан тухай Тайванийн Төмөр замын удирдах газрын орлогч дарга мэдээлсэн юм. Ослын газарт түргэн тусламж болон гал түймэртэй тэмцэх албаныхан ажиллаж байгаагийн зэрэгцээ Батлан хамгаалах яамнаас 120 алба хаагчийг аврах ажиллагаанд нэмэлтээр дайчлах шийдвэр гаргаад байна. Одоогийн байдлаар осолдсон галт тэрэгнээс бүх зорчигчийг гаргаад байгаа бөгөөд гэмтэж бэртсэн хүмүүсийг ойролцоох эмнэлэг рүү хүргэсэн тухай албаныхан мэдээлжээ.

Энэхүү харамсалтай үйл явдалтай холбогдуулан Тайванийн ерөнхийлөгч Цай Инвэнь хохирогчид болон тэдний ар гэрийнхэнд эмгэнэл илэрхийлээд улс оронд нь томоохон гарз хохирол учирсан үйл явдал боллоо хэмээн мэдэгдсэн юм.

Тайваньд өдөрт дунджаар хагас сая хүн зорчигч тээврийн галт тэргээр зорчдог гэх тоо баримт бий.

Б.Амарзаяа