Үндэсний баялгийн сангийн тухай хуулийг яаралтай горимоор баталж, сар гаруйн өмнөөс хэрэгжиж эхлээд байгаа. Тус хуулийн үр өгөөж мэдрэгдэж эхэлснийг иргэд хэлсээр байгаа. Түүнчлэн уул уурхайн салбарынхан ч энэ хуулийг дэмжиж байгаагаа илэрхийлсээр байна.
Гэвч тус хуулийг гадаад улс орны томоохон хөрөнгө оруулагчдыг үргээсэн хууль боллоо гэж монгол дахь олон улсын худалдааны танхимууд үзэж байна. Учир нь үндэсний баялгийн сангийн хуультай хамт ашигт малтмалын тухай хуульд нэмэлт өөрчлөлт оруулан баталсан. Нэмэлт өөрчлөлтөөр нэг хувьцаа эзэмшигч стратегийн ордын 34-өөс дээш хувийг эзэмшиж болохгүй гэх заалт оруулж ирсэн. Энэ хуулийн зохицуулалтаас шалтгаалж гадны хөрөнгө оруулагчид томоохон төсөл хөтөлбөрт хөрөнгө оруулахаасаа татгалзаж, гэрээ хэлэлцээгээ цуцалж эхэлжээ.
Ийнхүү баялгийн сангийн хуультай холбоотойгоор гадны хөрөнгө оруулагчид үргэн алга болох эрсдэл нүүрлээд байна. Харин нөгөө талаас иргэдийн амьдралд үзүүлэх эерэг нөлөөлөл ч ихэссэн байгаа юм.
