Өнгөрсөн Мягмар гарагт Чикагогийн биржийн арилжааны үеэр алтны ханш өсөж, нэг унцын үнэ анх удаа 3700 ам.долларын босгыг давжээ. АНУ-ын төв банк буюу холбооны нөөцийн сан бодлогын хүүгээ бууруулах хүлээлттэй байгаа тул хөрөнгө оруулагчид доллароо зарж, алтны худалдан авалтаа нэмэгдүүлж байна гэж мэдээллээ.
Энэ долоо хоногийн сүүлээр АНУ-ын хөдөлмөрийн статистикийн төв, эдийн засгийн шинжилгээний товчоо өнгөрсөн 8-р сарын инфляц, хэрэглээний үнийн индекстэй холбоотой албан ёсны тоон мэдээллийг танилцуулах бөгөөд албаныхан АНУ-д ажилгүйдэл нэмэгдэж, шинэ ажлын байрны тоо хүлээлтэд хүрээгүй гэх тоон мэдээллийг хэдийн өгсөн юм.
Үүнтэй холбогдуулан АНУ-ын төв банк буюу холбооны нөөцийн сан зээлийн хүүгээ бууруулах нь гарцаагүй гэж таамаглаж байна. Өнгөрсөн долоо хоногт АНУ-ын Хөдөлмөрийн яамнаас нийтэлсэн тоо баримтаас харахад 8-р сард эдийн засагт 75 мянган ажлын шинээр бий болно гэсэн хүлээлттэй харьцуулахад ердөө 22 мянган ажлын байр нэмэгджээ. Мөн өгөгдөл датанаас харахад АНУ-ын ажилгүйдлийн түвшин 8-р сард шинжээчдийн таамаглалтай нийцүүлэн 4.3 хувь хүртэл өссөн байна. Эдгээр тоо баримтын дараа энэ сарын хурлаараа ХНС хүүгээ бууруулах зах зээлийн бооцоо нэмэгдэж, ам.долларын ханш суларч, алтны худалдан авалт эрчимжжээ.
