ЗГ: 16 мянган айлыг ипотекийн 6 хувийн зээлээр орон сууцтай болгох сонгон шалгаруулалтыг ирэх оны төсөв батлагдсаны дараа зохион байгуулна

Засгийн газраас өчигдөр “100 мянган айлын орон сууц” үндэсний хөтөлбөрийг танилцууллаа. Тус хөтөлбөрөөр төрийн өмчийн 40 мянга, хувийн хэвшлийн 60 мянган айлын орон сууцыг иргэдэд санал болгож, гэр хорооллын 50 мянган өрхийн янданг буулгахаар төлөвлөжээ.

Төрийн өмчийн 40 мянган айлын орон сууцын хувьд “Сэлбэ”, “Шархад”, “Солонго 1, 2” хороололд төрийн өмчийн 3572 айлын орон сууц баригдаж байна. Цаашид 2027 онд 8238, 2028 онд 11246 айлын орон сууц ашиглалтад оруулахаар төлөвлөжээ. Ингэхдээ эдгээр орон сууцанд иргэдийг 4 өөр нөхцөлөөр хамруулах юм байна. Үүнийг 45 м.кв 2 өрөө орон сууц дээр жишээ татвал, 

1-рт, түрээсийн орон сууц. Иргэн байр худалдаж авахгүй, зөвхөн түрээсэлж амьдрах юм байна. Ингэхдээ 45 м.кв 2 өрөө байрны сарын түрээс 700 мянган төгрөг байхаар төлөвлөжээ.
2-рт, түрээслээд өмчлөх орон сууц. Иргэн сар бүр 700 мянган төгрөгийн түрээс дээрээ 720 мянган төгрөгийг байрны өмчлөлд тооцуулахаар төлж, нийт сардаа 1 сая 420 мянган төгрөг төлнө. Ингэснээр 20 жилийн дараа тус байр нь  тухайн иргэний эзэмшил болох юм байна.
3-рт, иргэд тухайн байрныхаа түрээс төлөхийн зэрэгцээ ипотекийн урьдчилгаа бүрдүүлэх хувилбар. Иргэн сарын 700 мянган төгрөгийн түрээс дээрээ 860 мянган төгрөг нэмж, 5 жилийн турш төлснөөр ипотекийн зээлийн урьдчилгаагаа бүрдүүлэх боломжтой. Өөрөөр хэлбэл, энэ нь шууд байр өмчлөх бус, эхлээд урьдчилгаа хуримтлуулах хэлбэр гэдгийг засгийн газраас онцолж байна.
 4-рт, хамтын өмчлөл багтаж байна. Энэ нь орон сууцны үнийн 50 хувийг түрээс эсвэл түрээслээд өмчлөх нөхцөлөөр төлж, үлдсэн 50 хувийг банкны зээлээр санхүүжүүлэх боломж юм. Ингэснээр иргэн тухайн орон сууцын нийт үнийг дан зээлээр төлөх шаардлагагүй болох юм байна.

Харин хувийн хэвшлийн 60 мянган айлын орон сууцын хувьд хувийн компаниудын 14832 айлын орон сууц энэ ондоо багтан ашиглалтад орох бол 2030 он гэхэд 82 мянга гаруй айлын орон сууц барихаар төлөвлөжээ. Үүнээс 60 мянган айлыг ипотекийн зээлд хамруулах юм байна. Үүний 39 мянган айл жилийн 6 хувийн хүүтэй ипотекийн зээлд хамрагдах бол 21 мянган айл эхний 3 жилд 6, үлдсэн 17 жилд 12 хувийн хүүтэй зээл төлөх нөхцөлтэй байна. Гэхдээ уг хөтөлбөрийг анх удаа орон сууцтай болох гэж байгаа өрхүүдэд зориулжээ.

Засгийн газраас ирэх 2027 онд 16 мянган айлыг ипотекийн 6 хувийн зээлээр орон сууцанд оруулахаар төлөвлөсөн бөгөөд сонгон шалгаруулалтыг ирэх оны төсөв батлагдсаны дараа нээлттэй, ил тод зохион байгуулах юм байна.