Энэ мягмар гарагт Абу Даби хотноо АНУ-ын зуучлалаар Орос, Украины төлөөлөгчид бараг дөрвөн цаг үргэлжилсэн хэлэлцээ хийлээ. Дэлхийн II дайнаас хойш Европ тивд өрнөсөн хамгийн том зэвсэгт мөргөлдөөнийг эцэслэх зорилготой уулзалтын эхний өдөр талууд олзны цэрэг солилцох хүмүүнлэгийн асуудал болон дайны дараах аюулгүй байдлын баталгааг голлон хэлэлцжээ.
Энэ оны 2-р сараас хойш Орос, Украины дипломатууд АНУ-ын зуучлалаар анх удаа нүүр тулан уулзлаа. Үндсэн хэлэлцээ эхлэхийн өмнө Украины төлөөлөгчид АНУ болон Европын холбоо, НАТО-ын төлөөлөгчидтэй тусдаа уулзаж, байр сууриа нэгтгэсэн байна. Харин Оросын эрх баригчид Европын төлөөлөгчдийг гурван талт уулзалтад оролцуулахаас татгалзсан тул үндсэн хэлэлцээ зөвхөн Вашингтон, Киев, Москва гэсэн бүрэлдэхүүнтэйгээр хаалттай горимд өрнөжээ.
Уг хэлэлцээнд АНУ-ын засгийн газрыг төлөөлж ерөнхийлөгч Доналд Трампын хүргэн Жаред Кушнер, тусгай элч Стив Уиткофф болон НАТО-ын Европ дахь нэгдсэн хүчний командлагч генерал Алексус Гринкевич нар оролцсон бол Оросын хэлэлцээчдийн багийг ерөнхийлөгчийн туслах Владимир Мединский, Украины багийг гадаад тагнуулын албаны дарга Рустем Умеров нар тус тус ахалжээ. Хаалттай хаалганы цаана өрнөсөн дөрвөн цагийн турш үргэлжилсэн хэлэлцээгээр гарсан хамгийн том ахиц дэвшил нь олзны цэргүүд болон энгийн иргэдийг бөөнөөр нь суллах хүмүүнлэгийн тохиролцоо байжээ.
АНУ-ын төрийн нарийн бичгийн дарга Марко Рубио хэлэлцээг "Маш үр дүнтэй" болсон ч бүх асуудал нэг дор шийдэгдэхгүй гэдгийг анхааруулж, цаашид Европын орнуудыг оролцуулах зорилготой байгаагаа мэдэгдэв. Украины ерөнхийлөгч Володимир Зеленський уулзалтыг "бүтээлч" хэмээн сайшааж, олзны цэрэг, хүүхдүүдийг буцаах болон аюулгүй байдлын баталгааг голлон ярьсныг онцолсон ч газар нутаг, армийн хүчний асуудлаар буулт хийхгүй гэдгээ дахин нотоллоо.
Харин Оросын гадаад хэргийн сайд Сергей Лавров газар нутгийн маргаанаас гадна бүх Европын аюулгүй байдлын шинэ бүтцийг эхлээд тохиролцох ёстой гэсэн хатуу байр сууриа илэрхийлсэн бол Европын удирдагчид уулзалтын гадна үлдсэндээ шүүмжлэлтэй хандаж, хэт өндөр хүлээлт тавихгүй байгаагаа мэдэгдлээ.
