Израил улсад эвслийн засгийн газар байгуулах ажил зөвшилцөлд хүрч чадаагүйн улмаас тус улс нэг жилийн хугацаанд гурав дахь удаагаа парламентын сонгууль явуулах шаардлагатай тулгараад байна.Өнгөрсөн 9-р сард явагдсан ээлжит бус сонгууль тодорхойгүй үр дүнгээр өндөрлөснөөс хойш Израилийн ерөнхий сайд Беньямин Нетаньяху болон түүний өрсөлдөгч Бенни ганц нарын аль нь ч эвслийн засгийн газар байгуулах тал дээр тохиролцоонд хүрч чадаагүй юм. Эргэн сануулахад Израилын сөрөг хүчний удирдагч, зэвсэгт хүчний генерал асан Бенни Ганцийн "цагаан-цэнхэр" намын эвсэл 120 суудалтай парламентад хамгийн их буюу 33 суудал авсан бол ерөнхий сайд Беньямин Нетаньяхугийн барууны жигүүрийн "Ликуд" нам 32 суудал авсан байна.Улмаар аль ч нам эвсэл парламентад олонх болж чадаагүйтэй холбогдуулаад ерөнхийлөгч Реувен Ривлиний зүгээс хоёр намын удирдагчдад хандаж, нэгдлийн засгийн газар байгуулах санал дэвшүүлсэн ч аль аль тал нь зөвшилцөлд хүрч чадаагүй юм. Ийнхүү лхагва гарагт хууль тогтоогчид хуралдаж парламентыг тараах шийдвэр гаргаснаар Израилын парламентын 3 дахь сонгууль ирэх оны 3-р сард зохион байгуулагдахаар товлогджээ.