ПСР шинжилгээ өгөх цэгүүдийн ачаалал өндөр байгаагаас шалтгаалж хот хооронд хүнс тээвэр хийдэг жолооч нарт хүндрэл үүсгэж байна. Жишээ нь замын-үүд Улаанбаатар чиглэлд хүнс тээвэр хийдэг жолооч Р.Лхагважаргалын гэр Замын-үүдэд байдаг. УБ-т хүнс тээвэрлэж ирээд 3 шөнө 4 дэх өдрөө өнжиж байна. Тэрбээр гэртээ харихын тулд ПСР шинжилгээ хийлгэх шаардлагатай ч сорьц дууссан, ажлын цагт багтаж чадаагүй зэрэг шалтгаанаар 3 хоног оочерлож байгаа юм байна.
Хүнс тээврийн жолооч Р.Лхагважаргал шинжилгээгээ өгөөд хариугаа авах хүртлээ машиндаа хонож, бэлэн хүнсээр амьдарч байна. Тэрбээр ПСР шинжилгээ өгөхөөр 3-4 хоног, шинжилгээний хариугаа хүлээж дахин 48-72 цаг нийт 7-8 хоног УБ-т гацах асуудалтай тулгарчээ. Тэрбээр хүнс тээвэр хийдэг жолооч нар бүх бичиг баримт тодорхойлолтоо үзүүлээд хурдан шуурхай шинжилгээгээ өгдөг болгох зохицуулалт хийж өгөхийг шийдвэр гаргах хүмүүсээс хүссэн юм.
Замын-Үүд-Улаанбаатар чиглэлд тогтмол хүнс тээвэрлэдэг 200 гаруй жолооч байдаг. Тэдгээр жолооч нар Р.Лхагважаргалтай яг адил нөхцөл байдалтай байна. Тиймээс шинжилгээ өгөхөөр УБ-т гацаад байгаа хүнсний тээвэр хийдэг жолооч нарын асуудлыг шийдвэрлэх шаардлагатай байна. Цаашилбал хүнс тээврийн жолооч нар хотод гацах нь Замын-Үүдээс ирэх хүнсний ногоо, бусад импортын хүнсний бүтээгдэхүүний үнэ өсөх ч шалтгаан болж байгаа юм.
